قالوا عنه كتير
روايات وحكايات
قالوا زمنه عدى
خلاص وفات
ونهايته من لحظات
ولا من حبة دقات
بس هو لسة
نابض بالآهات
هو حي وشاعر
بجميل الذكريات
وقالوا عنه ده
مغرور القسمات
وفيهم قال..
ده جميل الصفات
وشادي العبارات
ساحر الهمسات
ومهما كتبوا عنه
بالأساطير إنه مات
هو نابض هو رافض
إنه يكون أبداً رفات
ولا صورة محفورة
من الخرافات
مهما كتموا قلمه
وكمموا فيه السكات
وان مسحوا حتى
ظله من الصفحات
لسة حاسس المشاعر
لسة قلمه باصراره قادر
يكتب عن الحق دفاتر
قاله عنه مجنون وحاوي
أو حتى يكون مخاوي
وقادر يصحي الغافل
من السُبات
بيشوف الشمس
تضحكله..
من كل الجهات
بس عيبه هو طيبه
وبينسى الإساءات
فمهما باعوا ولا شاعوا
ولا طفوا نور المشاعل
لسة نوره جواه وشاعل
يكفي كل الشوارع
والميادين والحارات
ومن غير مسارح
ولا شوية هتافات....
قلبي حي مهما
قالوا إنه مات.
#حنان_أبو_زيدفي ٢٠٢٢/٣/١٠
