يارب .... حنان أبوزيد

يارب اجعلني أغفو غفوة
تريح بها جفون عيني..
وامسح منها دمعاً يؤلمني
واذهب عني يأساً يؤرقني
وحزناً وقهراً يغلبني
وداوي جسدي من
وجع أصابني
#حنان_أبو_زيد

همسات... حنان أبوزيد

أيقنت ان ليست الراحة في أن نحيا حياة جميلة فقط ... بل هي في أن نفرغ عقولنا من أي سلبيات مزعجة في الحياة.
#حنان_أبو_زيد 

جوايا حلم.... حنان أبوزيد

لسة جوايا حلم مستنياه
لسة ليه بقية أكملها معاه
جوايا يقين باحساسي شايفاه
حلم عمري سكة طويلة همشيلها
بس نلاقي حد يمسح دمعتنا ويشيلها
ومهما يكون همشي كتير بعيدة سنينها
بس بالنهاية هشوف زماننا بيتصالح علينا
مهما مرو ناس بطريقنا وبالدمع بكو عنينا
و مهما عاشرنا بشر جرحونا ومنهم اتأذينا
هيفضل جوايا حلم هو اللي انا عايزاه
وعشانه هقوى بالأمل وأديني متحملاه
لسة في طريقي نور أنا حساه
طول ما لسة بقدر اكتب حروفه
وطول ما فيه بكرة أكيد هشوفه
لسة في حد هيدفينا بحنانه وكفوفه
عشان هو أملنا ومعاه شموعنا يقيدو
هنفضل نكتب عن أساطير الحب وضيوفه
ونقرأ قصص العشاق وقمرهم وعزوفه
هيفضل جوايا حلم أنا عايشاه 
وهفضل أنا كدة مستنياه.
#حنان_أبو_زيد

دقة النبضات... حنان أبوزيد

قالوا هيعيش يومين معاكي ويطير
وقلت مستحيل ده حبه ليا عظيم
واتاريني كنت في وهم كبير
ومسمعتش كلام الناس الكتير
لما قالوا عليه ده بياع خطير
يبيع الهوى وبيعشق التغيير
انا أبدا مش حزينة عليه
ولا شاغلني فيه التفكير
ولا حتى ببكي لفرقته
لكن حزينة على طيبة قلبي ورقته
بس أيوة هقدر أعيش من غير حنيته
وهضحك وهغني ومن حياتي هبعده 
وهقول مترجعش أيامه ولا تعيده
انا أهو سعيدة وفرحانة  
ومش ببكي ولا بقول ندمانة
ولا لتغيير قلبه هكون حيرانة
ولا هقول وحشني كلامه معايا
ولا أنا حاسة بطيفه ملازمني جوايا
ايه يعني فراق ورحيل
مبقاش بعد هدم وطني شيئ مستحيل
مهو كان داري ووطني الجميل 
كنت بسامحه وكان بالي عليه طويل
دلوقت انا مرتاحة من الخلافات
ولا وجع ولا غم ولا آهات
بلا حب بلا خرافات
ده وهم نكتبه بس ف كلمات
خلاص الاحساس جوايا مات
وهو فيه رجوع للأموات
يظهر أنا صرت من المحترفات
بالكذب والاشاعات
بضحك على نفسي بشعارات
عشان أنساه وانسى معاه الذكريات
لكني بالنهار أبحث عن أي خبر عنه
أو حتى حكاية له من الحكايات
وبالمساء تلاقيني حاضنة صورته بالساعات.
انا كمان كذابة كبيرة وكذبي
واضح زي دقة النبضات.
#حنان_أبو_زيد

ازاي اعيش.... حنان أبوزيد

كان حبك نبضي اللي 
بيخليني أعيش
وكنت بفتكرك وقت الشدة 
ضهر وسند فارس ما يوقعنيش
كنت بحتاج حضنك يطمني
اخبي فيه عذابي وما يوجعنيش
أتاريك انتَ الوجع اللي مفارقنيش
وان حد قابلني يوم وسألني
ليه اتحملتي وما رجعتيش
ولسة هو جواكي ومندمتيش
هقول ان حبك عذابي وسعادتي
ومن غيرك ازاي بس أعيش..
#حنان_أبو_زيد

شيب القلب.... حنان أبوزيد

القلب صار عجوز وغطاه شيب الملل
كان له ضحكة حلوة لها رنين وجلل
يدوب معاها الحجر قبل البشر
مات في عينه الاحساس بالكل
كان نفسه يبقى طليق حر
أصبح سجين من غير سجان بيمر
زاد شيب شعوره من الفراق والقهر
راضي بيأسه وشارب معاه المر
وفنجان قهوته قاتم من غير فرحة تسر
دخان سجايره يتمنى يتحرر من الأركان
لكنه مسجون معاه في شقوق الحيطان
دخانه شاب من حرقة القهر والأحزان
زادت دموعه من شدة الصمت والكتمان
أصبح القلب عاجز زي الكهل في الميدان
الكسرة لها الف مليون وجع لو تكون 
من الأحبة والخلان 
قسوة الوحدة مرار وعذاب ونار بركان
نفسه يهرب من الشقوق زي الدخان
والقلب بائس خالي من الحظ غلبان
كان كل احلامه صاحب يديه الأمان
يسمع أنين أوجاعه ويحتوي الخوف
يكون له السند في كل الظروف
ويكون حمايته ويسند عليه كتفه والكفوف
ده كان ترانيم المشاعر والحروف
كان قلمه حاد وأشد من السيوف
اصبح يشوف الحبل يظنه تعبان مخيف
مسجون داخل وحدته وقلمه الضعيف
بعد ما كان زي الطائر الطليق الرهيف 
بعد ما كان هو العزة والحب العفيف
لكن احذروا اغلب الصمت بيكون 
اخره لهيب نيران
والسكوت لو نطق لن يمنعه خوف ولا أحزان
#حنان_أبو_زيد

الصدف... حنان أبوزيد

ساعات الصدف بتكشف لنا وجوه
بتشوف وشوش من كل شكل ولون
بتشوف الندل والفارس واللي
بلا قلب وعيون..
تدور فيهم على حقيقتك محتار تكون
انت بجد انسان طيب ولا انت ابليس ملعون
ولا اتقتل جواك الحنان والطيبة وحب الكون
#حنان_أبو_زيد