حزينة ليه مبئاش منا
متقربيش.. ده بعد بعيد عنا
وهانت عليه تنزل دموعنا
ومبئاش يفرق معاه رجوعنا
نسيكي ليه يا تمر حنة
ونسي كل الحب اللي بينا
وكل الكلام خلص واتقال
ومبئناش خلاص نيجي عالبال
حبيبي كان بيقول حلو الكلام
لو كان كلامه بيداوي وجعنا
ليه حاسة معاه كل الألام
ولا ينفع خلاص معاه ملام
ولازم نفوق من الأحلام
بس كان في عشرة حلوة
فرحنا فيها وغنينا كام غنوة
عشناها حلوة و عشناها مُرة
وضحكنا سوا كام مرة
وأدي جريت بسرعة الايام
خلاص بئى يا تمر حنة
أصبحنا كدة أغراب
ومبئاش في بينا عتاب
ولا حتى بئينا أصحاب
ولا هنرجع من تاني أحباب
وبالقلب جرح عمره ما طاب
مين السبب في وجع الحال
مش مهم مين طلع الجبل
ومين اللي شد الحبال
ومين صبر صبر الجمال
ونفضل نرمي
على بعضنا تقل وأحمال
المهم مين الأصيل
اللي حفظ الوصال
و حبنا بقلبه شال
ومين اللي عشان يبعد
صنع بسرعة جدال
وقطع للوصل كل الحبال
ونسي ياقلبي كل الوعود
نسي اللي كانت حنانه
وبسمتها له تورد خدود
راح فين رقة كلامه
راح فين لهفة سلامه
اللي مهما كان يقسى
يخليني من تاني أعود
الوجع خدني لبلاد بعيدة
وأرجع أفوق لجرحي
وأعود من تاني وحيدة
خلاص هو مبئاش منا
وراح في سكة تانية
ونسي حبه و تمر حنة
ومبئاش فاكرها بالمرة
انسيه يا تمر حنة
وبيعي اللي باعك
هو يعني عمره يوم صانك؟
ولا حتى صان ودادك
ولا حتى حس بألامك
بياع ومعروف أمامك
خلاص يا تمر حنة
كل الكلام خلص واتقال
ولازم على نفسك تكدبي
وتستني الليالي وتحسبي
وتقولي مش هيجي عالبال
بس هستناه القطر اللي جاي
وأنادي عالمنادي أو الشيال
يمكن لمح طيفه عند الخان
بيشتريلي حلق و لا خلخال
عارفة حبيبي مستحيل
ينساني كدة من غير سؤال
ولا يهون عليه دمعي ينسال
هيرجع ويقول سامحيني
يا أجمل من الجمال
تمر حنتي ست الحسن والدلال
ليست هناك تعليقات:
إرسال تعليق