مش هسيبك .... للمبدعة شاعرة العامية حنان الجوهري

مش هسيبك يوم لنفسك 
تفقديها وتندمى 
مش هسيبك تبقى ضايعة 
م اللى فات اتعلمى 

جاية اقدم لك نصيحة 
جاية اقولهالك صريحة 
مش هسيبك مهما يحصل
مش هسيبك ...... افهمى

لما كان ابسط حقوقك
تلقى منه الإهتمام 

كان بيخلص ف الإهانه 
كان عديم  الإحترام 

كنتى عايشة وانتى صابرة   
والمعامله مش تمام

كان يفوت اليوم عليكي
كل لحظة بألف عام

كت حياتك صعبة جداً
ضغط  فوق الإحتمال

فاكره لما كنتي خايفة 
والآمان كان م المحال؟!

حس ضعفك واستغله 
لجل خوفك ع العيال 

عاد وقالك انه آسف
وانه كان غلطان ف حقك

والشعور بالذنب قاتله 
لما ادرك انه خاسرك  
والمشاعر جتله فجأة
ف استعدى للمفاجاءة

انه مش طايق بعادك 
وانه دونك شخص ضايع 
وانه فعلاً كان بيحبك 
وانتى عنده بجد فارقة 

يعني جاى عاوزك تلينى 
وتبقى باقيه ع اللى فات
وقلبك المسكين ياعينى 
يتوجع حتى الممات 

يلا فوقى اوعي تبكى 
قولى للأحزان وداع 

لو رجعلك تانى يبكى 
يبقى ناوى ع الخداع

حافظى ع اللى باقى منك 
مش كفاية العمر ضاع ؟!

#حنان_الجوهري