عشتى اكبر تمثيلية ... بقلم/ الشاعرة المبدعة حنان الجوهري

عشتى اكبر تمثيلية 
وقومتى ببطولة وإخراج
ف ماتعشيش دور الضحية
وعلى نفسك وفرى احراج
هو كان محتاج لعطفك
وانتى اشد الإحتياج
حس منك بالموافقة 
تم بينكم  الإندماج 
حتى شاف ف عنيكى دمعة 
والف صرخة احتجاج 
وان ناقصك احلى حاجة 
وهى ....." حد يحس بيكى "
يعنى عارفة من ساعتها 
انه كان ضاحك عليكى 
و اعتبرتى غدره لعبة 
وكل يوم تحلى ف عنيكى
يبقى ما تقوليش خدعنى
وانتى واصلة ل ده بإديكى
و عايشة طول الوقت خايفة
انه يوم مايكونش ليكى 
ولما مل اللعبة صارحك
بإعتذار كان بيواسيكى 
والضمير قال فاق ف لحظة  
بعد ما دمر احلى ما فيكى 
نمتى وفوقتى اوام على صدمة 
دعوة فرحه مرسلة ليكى
عليها اسمه واسم ضحية 
هيلعب بيها من بعديكى 

.........  حنان الجوهرى