( إوصفلي شعورك ) .... بقلم شاعر العامية المبدع معوض حلمي

لو تعبت خطاويك ع السكه
لو تاهت  حيرتك  وظنونك
لو  حواليك  الدنيا   بحالها
وانت وحيد عايش بهمومك
أنا  زيك   عشت   شعورك

ف ارسم  على خدك  ورده
لونها  بألوان ....... الطيف
وسيبها  تداعب خد النسمه
 ف  البرد  أو  ليلة   صيف
وساعتها اوصفلي شعورك

طب  طلع من  قلبك ضحكه
ترسم  على   وشك  نورك
هاتدوب  ف عنيك  الدمعه  
قدام  فرحك .... وسرورك
وساعتها اوصفلي شعورك

إرمي  حمولك  على  بكره
وقول  الكلمة  اللي تزينك
وازرع  من  أحلامك  فكره
هاتشوفها   بتطرح  خيرك
وساعتها اوصفلي شعورك

أنا أصلي  مجرب ميت مره
وشعوري  أنا  باوصفهولك
قوم   عيش  الأيام  الحلوه
سامح واتخطى .... ظنونك
هتلاقي  الدنيا  بتضحك لك
وبترسم على وشك  نورك
وساعتها اوصفلي شعورك 

وساعتها اوصفلي شعورك 
~~~~~~~~~~~~~~
بقلمي    .. 
معوض حلمي 
منشأة بطاش 
تمي الأمديد 
دقهلية