( فين النخوة ) .... بقلم الشاعر المبدع معوض حلمي

وصحيت من نومي 
على حلم كأنه
 كابوس جبار
فقلت 
اتسلي على الأخبار
وشوفت ترامب 
وكيم إيل يونج
قاعدين مع بعض 
ف قاعده سودوكو
ودخلت الغابه 
وشوفت شكوكو 
بيلعب مع هتلر
ويرش الدوكو
بلون أخضر
وربيعنا العربي 
ماجاش أخضر
وتابعت 
ف سوريا المنظر
حادي  يا بادي
وروحنا الموصل
والبغدادي
شيخ  المنصر
قطع  الروس
وحكم فيها 
بشرع مجوس
وشوفت تيوس
وتيران بتدوس
على  روس الخلق  
حتى الفرس 
حافظه الكورس
قالت فيها ياناس
لا اخفيها
ورقصت سيكا
عشان أمريكا 
تسيب الملعب
والأتراك 
على جبهة إدلب
سنه سنانها
لاجل ماتنهب
قالوا الحرب 
ياناس حتميه
ولازم نغلب
وشوفت بوتين 
ويا  التنين
ل اتنين  حلوين
عايمين في المانش
حتى  إيطاليا 
كمان مانساتش
تركة  ليبيا
وإيجت تاخد 
دور في الماتش
والكل  بيغني
على  ليلاه
وعاش الشعب 
العربي  آساه
نام في سنين
الجهل  وتاه
ونسينا الأقصى 
وفلسطين
فين النخوه 
فين حطين
فينك ياصلاح الدين
قول لي علومك
قوم من نومك 
واحمي  الدين
نادي علينا 
بعلو الصوت 
صحي النايمين
قبل مانبقى 
دبيحه بجد
وتكتر حوالينا
السكاكين

وتكتر حوالينا 
السكاكين
_____________
بقلمي ......... 
معوض حلمي 
منشأة بطاش 
تمي الأمديد