( .. بهيه .. ) بقلم شاعر العامية المبدع معوض حلمي

عارفين بهيه .. ؟

بنت  فلاحه  وعفيه
لابسه توبها ومستحيه
حتى جوا البيت تقيه
بتصلي لما الفجر يدن

بهيه نسمه ونيه صافيه
زي نور الشمس دافيه
طارحه خضره وخير وعافيه
وف نن عيني  جميله  جدا 


بهيه  دي  زي  الندى
راسمه  المدى 
أحلام  كتييييير
بهيه دي قلب بضمير
تبدر  الود  ف رحابه
تحصد  الحب   الوفير

بهيه سارحه في الوريد
شايف عينيها من بعيد
نجوم بتضوي في السما
وهلال  سعيد 

بهيه دي أجمل متاع
سحرتني بعنيها الوساع
نازله جدايل شعرها 
وقلبي داب من حسنها
والصبح دافع مهرها
والليل  شراع

بهيه حته من السما
حنانها سارح بالوما
وهواها   غيم
إياك تقولوا الليل 
في وجودها عتم
أو جاي مضلم
كل الحكايه ان القمر
من سحرها أصبح رتوش
بهيه  ماشيه
ع الخدود وع الرموش
والعيون زي الورود
مابيجرحوش
وتجود بضحكة سنها
ولثغرها حنت وشوش

بهيه دي طيبه 
فاتحة البيبان للريح 
تسمع كلام  الرخيص
وترضى بالتجريح
بهيه دي مننا
وساكنه جوا الروح
هديه من ربنا
ونبني ليها صروح
وحته من قلبنا 
تروح فداها الروح

تروح فداها الروح
________________
بقلمي الفلاح الفصيح 
معوض حلمي 
منشأة بطاش
تمي الأمديد 
دقهلية