يا مفرقين الوجع .... بقلم الشاعر المبدع فهمي علي

يا مفرقين الوجع .. هو انتو ما زهقتوش ؟
بتقطعونا حتت ... ليه بس ما فهمتوش 
ان احنا رغم الالم ... واقفين لكم حالفين 
ان انتو كافرين ..  عشان امر الله ما فهمتوش 
مسلم .. مسيحى ماهيش فارقة مع اسيادنا 
اللى هاممكم يسيل الدم ف بلادنا 
لكن ف يوم الحساب و معادكو و معادنا 
ربى وعدنا يجيب حق اللى ما ظلمكوش 
اخرتها ايه و النبى .. و ف انهى شرع و دين 
القتل يبقى لغة ... و الشك يبقى يقين 
و الفحش يصبح هدف و شمالكو يبقى يمين 
و لحد فين ننتظر م الكفر ييجى يحوش
الدنيا من فجركم فرحانة واقفة تشوف 
و نبينا من مرقده .. من فعلكم مكسوف 
دا ما قالش فى سنته .. ترعب اخوك م الخوف
بالعكس .. وصا و قال .. اياكو ما تحبوش
يا مفرقين الوجع .. ف الاخرة راح تلاقوه 
ساعة لا ينفع ندم ... و لا تعرفو تخبوه 
هتقول اميرى  امر ... بس انت م اللى طاعوه 
انت و اميرك .. لريحة الجنة ما تشموش
#فهمى_على